भ्रष्ट नेता व इमान्दार पत्रकार आपालं सकिपाया पात्र जुइधुंकल। नेवाः संकिपा ख्यलय् धाःसा दकलय् न्हापांखुसि ‘धकीं दुने’ संकिपाय् थज्याःपिं पात्र खनेदत। नेतागिरीया लिधंसाय् तस्करी याइपिं आपालं संकिपाय् खनेदये धुंकल। ‘धकीं दुने’ नं अज्याःपिं पात्र दु। थ्व ल्याखँ ‘धकीं दुने’ यात पात्रय् हःगु विविधताया निंतिं च्वछायेमाः। तर पात्र जक दयां छु याये? बाखँ नं स्यल्लायेमाः। अले प्रस्तुतीया शैली नं धिसि लायेमाः। अनंतिनि संकिपायात बांलाः धायेथाय् दइ। आः ‘धकीं दुने’ यात छु धायेगु खः। उकिया बारे छकः चर्चा याये।

 ‘धकीं दुने’ या बाखँ थौंया राजनीतिक घटनालिसे ज्वलाःगु घटना नापनापं न्ह्याइ। खुसः व छम्ह सभासद जानाः संविधान च्वये मफुगु घटनाया बारे छम्ह पत्रकारं नेतातय्के इन्टरभ्यू काःगु लु खनिबलय् ‘धकीं दुने’ छगू राजनीतिक विषय वस्तुया संकिपा थें च्वनी। तर थुके पत्रकार जुयाच्वंम्ह सुशील श्रेष्ठ व देवीना महर्जन दथुया मतिनाया बाखँ नापनापं न्ह्याइ।

संविधानसभाया थपे जूगु म्यादया खँ ज्वनाः न्ह्याःवंगु बाखनय् लिपा वनाः नेतायात तस्करया रूपय् न्ह्यब्वइगु। अले थथे तस्कर यानाच्वंगु लु थःगु क्यामेराय् दुने कुनेत ताःलाम्ह पत्रकार इन्जा नेवाःयात इमिसं स्यानाबी। तर द्वपं धाःसा हिरो सुशील श्रेष्ठयात लाकी।

थज्याःगु बाखं आपालं फिल्मय् वयेधुंकल। नेवाः संकिपापाखे धाःसा न्हापांगु जुल। थ्व बाखनय् धिसिलाःगु संकिपा तयार जुइगु सम्भावना दु। तर ‘धकीं दुने’ जुइ फयाच्वंगु मदु। छगू हे संकिपाय् सकतां खँ दुथ्याकेगु लोभय् थ्व छगू बामलाःगु संकिपाया रूपय् परिणत जुल। संविधानसभाया म्याद दच्छि थपे याःगु घटना स्वयेबलय् थ्व २०६७ या संकिपा थें च्वनी र तर थ्व संकिपाय् ‘टाइम फ्याक्टर’ या गनं व्याख्या मदु। डाक्टर ब्ववने धकाः वम्ह देवीनां गुलि ई नेपालंपिने च्वन धइगु खँ क्यनिगु छुं कथंया लू मदु। अथे हे तुं छक्वः बैंकक वने धकाः धाःम्ह हिरो मेगु हे लुइ हिरोइनलिसे म्ये हाला प्याखँ हुलाच्वनी। अले निगू प्यंगू लू धुंकाः तिनी बैंककं फोन यानागु धकाः फोन यानाच्वंगु छपुलु स्वये दइ।

‘धकीं दुने’ या सलल न्ह्याकेत स्क्रिन प्ले धिसि लायेमाःगु खः। तर अथे मजू। तसकं फ्यासु। फिल्म दयेकीम्ह डाइरेक्टर व फिल्मया हिरोइनया लु माःथें मच्वं। हरिमान दिवाकरयात ‘क्यारेक्टर’ नं उलि ताःलाये मफु। थ्व क्यारेक्टरया चित्रण ताःलाःगु खःसा संकिपायात माःगु कमेडी दइगु खः।

 छगू संकिपाया मूख्य जग धइगु स्क्रिन प्ले खः। अले स्क्रिन प्ले तयार यायेबलय् बाखँया विस्तार छसीकथं सलल न्ह्याःवनेमाः। उके दुथ्याकूगुपिं डाइरेक्टरया थ्री डाइमेन्सन अर्थात बायोलोजिकल (जीवन शैली), सोसियोलोजिकल (सामाजिक) व फिजियोलोजिकल (शारीरिक) मेन्टेन यायेमाः अले अज्याम्ह डाइरेक्टरयात न्याय संगत जुइ कथं न्ह्याकेमाः। थुके अथे जुइ फयाच्वंगु मदु। संकिपाया शुरुआत छुं बांलाःगु संकेत क्यंसां लिपा वनाः संकिपा घितिघिति नयाः न्ह्याःबलय् स्वकुमियात थाकुइफु। उकिसनं संकिपाया क्लाइमेक्स थेंजाःगु महत्वपूर्ण खँयात सर्वोच्च अदालतया लू जक क्यनाः पार यात। थुकें छम्ह स्वकुमिया प्याःचाः लंकी मखु।

मूभि स्टेशनया निंतिं हिरो सुशील श्रेष्ठ थम्हेसिनं न्ह्यब्वःगु थ्व संकिपाया निर्माता मय्जु रविना श्रेष्ठ खः। निर्देशक पवन जोशी, संगीत गोविन्द ह्युमत–विजेन श्रेष्ठ, द्वन्द्व उदय श्रेष्ठ, छायांकन विश्वराज कपाली, नृत्य सुरज महर्जन, अले सम्पादन समीरं याःगु थ्व फिल्मय् सुशील श्रेष्ठ, देवीना महर्जन, इन्जा नेवाः, मोहिदिन खान, प्रभात कुमार ख्येँ, कृष्णभक्त श्रेष्ठ, उजाता शाक्य, सनमकुमार श्रेष्ठ, रत्नकाजी लूनिभाः थेंज्याःपिं आपालं कलाकारतसें अभिनय यानातःगु दु। इपिं दक्वसिनं थःथःगु ज्याय् उलि मेहनत याःगु खनेमदु। मखु धइगु खःसा छगू गंभीर बाखं जुइगु ‘स्कोप’ दुगु थ्व संकिपा थुलि फ्यासुइ मखु जुइ।